कालची थंडी कुठे जोरात होती

कालची  थंडी  कुठे  जोरात होती

वाढली थरथर कशी ओठात होती

एवढी अडचण पुढे जाण्यास होती

जात  धर्माची  दरी  दोघात  होती

टांगता आली न भिंतीवर  घराच्या

एक प्रतिमा काळजाच्या आत होती

एवढे  कळले  तुझ्या  शहरात येउन

माणसे  साधीसुधी  गावात  होती

घेतली  दिवटी  तिने  हातात आता

आजवर  ती  फक्त  अंधारात होती

फुंकले  होते  हवेने  कान  अमुचे

त्यामुळे  भीती  मनाला खात होती

-   सतिशसिंह मालवे